‘सत्याग्रह’लाई विस्थापित गर्दै ‘होस्टेल’, धेरैपछि नेपाली सिनेमामा लाठीचार्ज

सिनेमाको प्रचारप्रसार दर्शकसम्म पुग्न सक्यो र राम्रो मार्केटिङ गरियो भने चलचित्रले उत्कृष्ट व्यापार गर्छ भन्ने उदाहरण केही हप्ता अघि प्रदर्शनमा आएको बलिउड चलचित्र ‘चेन्नई एक्सप्रेस’ले देखाएको थियो ।

यही उदाहरण लामो समयपछि नेपाली चलचित्र क्षेत्रमा पनि दोहोरिएको छ । शुक्रबारबाट प्रदर्शनमा आएको चलचित्र ‘होस्टेल’को व्यापारले यस्तै कुराको संकेत गरेको छ । शुक्रबार पनि सिनेमा हेर्न दर्शक हलसम्म नआइरहेको अवस्थामा ‘होस्टेल’ले देशभर बम्पर ओपनिङ गरेको छ । चलचित्र हेर्न दर्शक ओइरिएपछि बलिउड चलचित्र ‘सत्याग्रह’का लागि छुट्टयाइएका शोहरु पनि ‘होस्टेल’को भागमा परेको छ ।

चलचित्र हेर्न दर्शक ओइरिएपछि काठमाण्डौको गोपीकृष्ण हलमा लाठिचार्ज भएको बताइएको छ । ‘सत्याग्रह’लाई सानो हलमा सारेर ‘होस्टेल’लाई ठूला २ वटा हल दिइएको छ । यस्तै चलचित्रको शो काठमाण्डौको क्यूएफएक्समा पनि थपिएको छ ।

मोफसलबाट पनि सिनेमाको रिपोर्ट सुखद आइरहेको छ । पोखरा, नारायणगढ लगायतका क्षेत्रमा चलचित्रले बम्पर ओपनिङ गरेको छ ।

शुक्रबार सिनेमा हेर्ने दर्शकको भिड देखेर शनिबारको व्यापारको समेत आँकलन सुरु भैसकेको छ । लामो समयपछि नेपाली सिनेमाले ओपनिङ कलेक्शनमा सुखद सुरुवात गरेको हो । चलचित्रलाई दर्शकहरुले मन पराएको बताइएको छ । सुस्ताएको नेपाली सिनेमाका लागि यो एक सुखद खबर हो । यसअघि पनि केही नेपाली चलचित्रले बलिउडका चर्चित कलाकारहरुले खेलेका सिनेमालाई हलबाट नै विस्थापित गरेका थिए ।