इच्छामा आयुष्माको डेब्यु

चलचित्र निर्माणमा सक्रिय रहँदै आएका मुनाल घिमिरेले अब आफै निर्देशन गर्ने भएका छन् । हुन त यसअघि उनले ‘खबरदार’ नामक भिडियो चलचित्र निर्देशन गरिसकेका छन् तर यसपटक भने उनले फिचर चलचित्र नै निर्देशन गर्दै छन् । घिमिरे चलचित्र ‘इच्छा’ को निर्देशन गर्न लागेका हुन् । उक्त चलचित्रको एक कार्यक्रमका बीच औपचारिक घोषणा गरिएको छ ।

चलचित्र घोषणा कार्यक्रममा निर्देशक घिमिरेले भने, ‘यहाँहरूको साथ र सहयोगको अपेक्षा लिएर इच्छामार्फत निर्देशनमा हात हालेको छु ।’ उनले यसअघिका चलचित्रबाट सिकेको अनुभव दर्शकको चाहनानुसार ‘इच्छा’ मार्फत प्रस्तुत गर्ने बताए । ‘मैले चलचित्र कस्तो बनाउँछु, त्यो छायांकन सम्पन्न भएर प्रदर्शनमा आएपछि मात्र थाहा होला,’ उनले भने, ‘तर दर्शकलाई मन पर्ने चलचित्र निर्माण गर्नेछु ।’

चलचित्र ‘इच्छा’ मा दयाहाङ राई, सुवास थापा, दीपशिखा शाही, देशभक्त खनाल, रश्मी भट्ट, आयुष्मा कार्कीलगायतका कलाकारको अभिनय रहने भएको छ । चलचित्रमा रोशन श्रेष्ठको द्वन्द्व तथा गम्भीर विष्टको कोरियोग्राफी रहनेछ ।