चलचित्रको शुरुवात गौरा 'सुदूरपश्चिमको प्रमुख पर्ब'को राम 'रमिता' हेर्न गएकी कान्छी खत्रीनीबाट शुरु हुन्छ । राम हेर्दा हेर्दै व्यथाले च्यापेपछि उनले छोरीलाई जन्म दिन्छिन । जसको नाम गौरी राखिन्छ । गौरीको जीवन १७ बर्षको उमेर एउटा यस्तो मोडमा पुग्छ । उनी बुवा कान्छो खत्रीले लिएको ऋणमा बन्धकी हुन्छिन । जुंगे ठालुबाट लिएको ऋण तिर्न नसकेपछि गौरीलाई काम गर्न पठाउछन, कान्छा खत्री । तर गौरी जुंगे ठालुकहाँबाट भागेर शंकरसंग जान्छिन् ।
नायक शंकरले गौरीलाई भगाएर लगेपछि जन्तीमाथि जुंगे ठालुले आक्रमण गर्छन । त्यतिबेला गाँउलेले शंकर र गौरीलाई साथ दिन्छन । जुंगे ठालु एक्लै हुन्छन । सामाजिक एकताका अगाडि उनले घुडा टेक्नुपर्छ । गाँउका जनतासंगै मिलेर आफ्नो जीवन बिताउने प्रतिबद्धता गर्दै जुंगे ठालुले जीवनको उत्तराद्र्धमा आफूलाई सुधारेका छन् । अन्त्यमा सामाजिक एकताको आह्वान गरेर कथा टुंगिएको छ ।
गौरीको पुरै कथा गौरी, नायक शंकर, जुंगे ठालु, कान्छो खत्रीका वरिपरि घुमेपनि सुदूर पश्चिमको भाषा, संस्कृति, परम्परा, छाउपडी प्रथा,कुमारी प्रथा, जातीय छुवाछुत, साहु र ऋणीबीचको द्धन्द ठालु प्रथा गौरीमा समेटिएको छ । गौरीमा बैतडी,डोटी र अछामी गरी तीन भाषाको प्रयोग गरिएको छ । जुंगे ठालु र उनको छोरा जंगेले सोझा साझा गाँउलेमाथि गरेको अन्याय र अत्याचार पनि गौरीमा देखाईएको छ । गौरी हेर्ने मान्छे नरुने कोही हुने छैन । कथाकार तथा निर्माता मल्लको दावी थियो, तीन वटा दृष्ययस्ता छन,जो हेरेपछि दर्शकको मन थामिदैन । आफैले लेखेको कथा, र त्यसैमा आधारमा आफैले बनाएको टेलिचलचित्र हेरेर आफै रोएको मल्लले सुनाए ।
बाले ऋण तिर्न नसक्दा १७ बर्षिय गौरीलाई जुंगे ठालुले लैजान खोज्दाको क्षण र उनलाई जन्तीमा अन्माउन लाग्दाको क्षणले दर्शकलाई रुवाई छाड्छ । गौरीले जुंगे ठालुको घरमा काम गर्दाका ठाडेभाकामा व्याकराउण्डमा गुञ्जिएका गीतले पनि दर्शकहरुलाई भावुक बनाउछ । गौरीको कुनै चलचित्रसंग तुलना हुनसक्दैन । किनकी डोटेली भाषामा अहिलेसम्म बनेको यो पहिलो टेलिचलचित्र हो । सुदूर पश्चिमकै भाषा,भेष, संस्कृति र परम्परा बोल्ने गौरी बनाउदा मल्लले कम सास्ती खेप्नु परेन । तर डोटेली भाषाको पहिलो चलचित्र बनाउन पाउदा उनले सबै दुःख र पीडा बिर्सिएको बताए ।
कलाकारितामा नवप्रबेशी प्रितम कठायत नायक शंकरको भुमिकामा छन् । केही गीतमा मोडल भएर काम गरेसकेकी चाँदनी मल्लले नायिका गौरीको भूमिका निर्बाह गरेकी छन् ।
खलनायकमा जुंगे ठालुका नाममा डिल्लीसिंह थापाको भूमिका सशक्त छ । जुंगे ठालूका नाममा देखिएका थापाले आफ्नो भूमिका प्रति न्याय गरेका छन् । गौरीमा छत्र मल्ल, तिर्थ बम, दल बहादुर बोगटी, पबित्रा बोगटी, जानकी केसी लगायतका कलाकारले अभिनय गरेका छन् ।
२०६४ असार १ मा छायांकन शुरु भई २०६५ बैशाखमा सम्पन्न भएको गौरी २ घण्टा १५ मिनेट लामो छ । ६ लाख रुपैयाको लागतमा निर्माण भएको गौरीका निर्माता र कथाकार खडक मल्ल स्वयमले पूजारीका रुपमा अभिनय गरेका छन् ।
0 comments:
Post a Comment